GENERAL SANTOS CITY – Gawas sa mukabat sa 800,000 ka mga estudyante sa public schools sa Luzon ug ubang bahin sa nasud nga naka-avail sa libreng bakuna nga Dengvaxia, posibleng kapin milyon usab ang mga bata nga nagpabakuna sa mga pribadong pediatricians sa tibuok nasud.
Kini ang gibutyag ni Kag. Joel Aton sa Alabel, sa pakighinabi sa Bombo Radyo.
Sumala pa nga nahimong “commercially available” kaniadto ang naasoy’ng bakuna sa mga pribadong klinika hinungdan nga daghan usab ang nag-avail ug napabakunahan.
Hinuon, wala matud pa nila gibasol ang mga pribadong pediatricians gumikan sila usab mismo nga mga ginikanan ang nagdesisyon nga pabakunahan ang ilang mga anak.
Apan human nabulgar nga may negatibo kining resulta sa mga bata o tawo nga wala pa nagka-dengue, ug ang mga gikataho karon nga may duha na ka bata nga gituuhang may kalabutan sa Dengvaxia, giangkon ni Kag. Aton nga na-praning na sila isip mga ginikanan, hilabi na nga tulo sa iyang mga anak ang nabakunahan, kung asa duha ang nakakumpleto sa tulo ka shots.
Ug gani, hugot na matud pa nilang gibantayan ang ilang mga anak.
Sa karon nanghinaot na lamang ang nasampit nga opisyal nga may mahimong development sa gipagawas nga pahayag sa Sanofi Pasteur nga maoy manufacturer sa Dengvaxia, dungan sa hugot usab nga pagmonitor sa ilang mga anak.
Samtang, Samtang, gihingusgan ni Mely Lastimoso, labaw sa City Epidemiology and Surveillance Unit, nga dili makamatay ang bakuna. Kini human nga gikahadlukan na usab bisan sa daghang ginikanan bisan ang ubang mga matang sa bakuna, tungod sa misinformation o sayop nga impormasyon nga nagkatag karon.
Dugang pa niini ang taho nga nagkanayon nga sa 2018 mamatay na ang tanang nabakunahan sa Dengvaxia, maoy nagpasamot sa kahadlok sa katawhan.
Apan giklaro ni Dr. Lastimoso nga dili ang mismong bakuna inay ang reaksyon niini ang pwedeng makamatay, hilabi na sa hisgutanan sa Dengvaxia vaccine.
Gikabutyag nga Oktobre miaging tuig nagsugod sila sa ilang surveillance alang sa mga bata nga nabakunahan sa Dengvaxia, kung asa sa karon aduna nay walo sa ilang listahan.
Apan may pediatrician matud pa silang nasayran nga may 80 ka bata nga nabakunahan.
Hinungdan nga nanawagan si Dr. Lastimoso ngadto sa mga ginikanan sa mga bata nga nabakunahan sa naasoy’ng dengue vaccines nga mudangop sa labing duol nga health centers, aron matala ug mamonitor ang ilang mga anak.
