GENERAL SANTOS CITY – Mitahan sa mga militar ang duha ka NPA leaders nga miyembro sa Guerilla Front 51, Southern Mindanao Regional Committee (SMRC) sa Sta. Cruz, Davao Del Sur.
Base sa report sa 73rd Infantry Battalion Philippine Army, giila ang mga mitahan nga lider sa naasoy’ng komunistang grupo nga silang Randy Atong, Finance and Logistics Officer sa Andoy and Basil Platoons sa Guerilla Front 51, ug Renie Atenza, Team Leader sa First Squad, Basil Platoon, sa nasampit nga grupo.
Nakahukom matud pa ang mga nasampit nga mutahan tungod napul-an ug nalisdan na matag maka-engkwentro ang tropa sa gobyerno, ug tungod usab sa grabeng kagutom sa ilang pagpamukid.
Wala matud pay dala nga armas ang mga nasampit dihang mitahan, apan gisugilon nila nga may gitago nga usa ka M14 Rifle, M16 Rifle ug M203 Grenade Launcher sa usa ka lugar sa Brgy Sibulan, Toril District, Davao City.
Gumikan niini, gilayong miadto ang Alpha Company sa 7rd IB sa nasampit nga lugar, ug malampusong nakuha ang nahigustang mga armas.
Kahinumduman nga miaging bulan lamang walo ka NPA members sa Guerilla Front 71 ang mitahan sa 73rd IB, bitbit ang duha ka high-powered firearms.
Kini human ang nahitabong engkwentro tali nila ug sa militar kaniadtong December 1, 2017, nga miresulta sa pagkamatay sa duha nila ka kauban, ug pagkarekober sa lima ka tag-as nga kalibre sa armas.
