GENERAL SANTOS CITY – Blangko pa ang mga sakop sa Makar Police Station sa posibleng motibo sa pagpusil-patay sa CVO sa Brgy Apopong nga si Jay Mangelen.
Sa pakighinabi sa Bombo Radyo, gibutyag ni Police Chief Inspector Renato Salarda, hepe sa nasampit nga police station, nga wala silay record kang Mangelen, o bisan taho nga may nakabangi niini.
Hinungdan nga sa karon, mas gipalawman na lamang nila ang gihimong imbestigasyon, ug gaagad usab sa mamahimong pahayag sa mga kabanay sa biktima.
Gilauman usab nga makatabang ang mamahimong resulta sa gihimong ballistic examination sa mga basyo sa bala nga narekober sa crime scene aron i-cross-matching aron matumbok kon malambigit sa ubang pagpamusil nga natigayon sa siyudad.
Makig-alayon na usab sila sa kapulisan sa Columbio, Sultan Kudarat, aron masuta ang background ni Mangelen.
Samtang, gibutyag usab ni Salarda nga medyo layo ang posibilidad nga may kalabutan kini sa mga kanhing kaminyuon sa biktima, gumikan bisan ug ikatulo na ang kasamtangang asawa sa biktima, nahimong maayo ug giagi matud pa sa Islamic rights ug duha ka tuig na kadtong nakalabay.
