GENERAL SANTOS CITY – Kasuhan gihapon ang 19-anyos nga lalaki nga matud pa may diperensya sa pangisip, human matud pa gilugos ang 8-anyos nga babaye nga silingan.
Matud kang Police Chief Inspector Renato Salarda, hepe sa Makar Police Station, kasamtangang anaa sa ilang kustodiya ang wala na gipanganlan nga suspek, nga taga-Brgy Labangal ning dakbayan.
Nasayran nga halos igsuon na alang sa biktima ang suspek nga kanunay matud pang anaa sa ilang panimalay.
Una niini, nagduda ang inahan sa 8-anyos, human naabtan ang suspek ug biktima nga naputos ug habol.
Kadugayan giangkon sa anak nga gihilabtan siya sa gikonsidera na niyang kuya.
Wala usay pagduha-duha nga giangkon sa suspek ang gihimong pagmolestiya sa biktima.
Giapaabot na lamang sa kapulisan ang resulta sa medical examinations sa biktima, alang sa pagpansag-at ug kasong rape batok sa suspek.
