GENERAL SANTOS CITY – Nagpabilin sa talandugon nga kahimtang sa ICU sa balay-tambalanan ang 17-anyos nga babaye human maigo sa aksidente pagbuto sa pusil sa pulis nga nagmaneho sa gisakyan nga tricycle sa biktima.
Giila ang naasoy’ng biktima nga si Michelle Calambro, taga-Litanville, Sinawal ning dakbayan. Samtang ang lain pang usa nga biktima nga si Ludy Bee Otya, 18-anyos nga taga Purok malipayon Apopong ning dakbayan, nga nadaplisan sa bala, ang anaa na sa luwas nga kahimtang.
Kahibaluan nga ang duruha ang lakip sa unom ka pasahero nga misakay sa tricycle nga maneho ni SPO2 Anacorito Alegarbes, 35-anyos, taga Brgy Apopong. Nasayran nga gikan matud pa sa iyang trabaho ang pulis ug namasada usa, una muuli.
Samtang nagdagan ang tricycle sa Johnny Ang Paradise, pasado alas dyes miaging gabii, kalit matud pang nahulog ang pusil nga caliber 45 pistol ni SPO2 Alegardes ug mibuto sa makadaghan nga higayon, hinungdan nga naigo ang duha ka biktima.
Sa pagkakaron, gibutyag ni Police Senior Inspector Lemuel Enrijo, deputy chief of police sa San Isidro Police Station, nga nagpabilin sa ilang holding area si SPO2 Alegarbes, human bulontaryo nga nagsurrender kanila.
Gibutyag matud pa ni Alegarbes nga aksidente nga mibuto ang iyang pusil samtang nagmaneho sa iyang tricycle.
Hinuon, gipasalig na matud pa sa nasampit nga pulis nga abagahon ang balayrunon sa ospital, sa duha ka mga biktima nga aksidente naigo sa pagbuto sa iyang pusil. Samtang, padayon ang imbestigasyon sa kapulisan, kalabot sa naasoy’ng insidente.
Samtang, posibleng matangtang sa pagkapulis ang sakop sa Philippine National Police, gumikan sa pagdala-dala ug pulis bisan ug off-duty.
Kini ang gibutyag sa Bombo Radyo ni Atty Teodoro Sales, inilang abugado dinhi sa dakbayan.
Sumala pa nga bisan ug wala kadto tuyua nga panghitabo, apan gumikan sa iyang pagdala-dala ug pusil gawas sa iyang trabaho, mahimo matud pa siyang mag-atubang ug kasong administratibo, kung asa posible siyang masuspenso o matangtang sa pagka-pulis.
Kalabot sa kasong kriminal, posible matud pang pasakaan si SPO2 Alegarbes ug kasong reckless imprudence resulting to physical injury gumikan sa pagkaangol sa duha ka biktima, ug kon ugaling mamatay ang kritikal nga biktima, reckless imprudence resulting to homicide.
Dungan niini, gihingusgan ni Atty Sales nga isip usa ka pulis ug tigpatuman sa balaod, kinahanglang gina-practice gayud nila ang insakto nga paghupot sa iyang armas.
