GENERAL SANTOS CITY – Hisgutanan karon sa social media ug aduna nay halos unom ka libo nga views sa Facebook ang natigayong marriage proposal atul sa flag-raising ceremony kagahapon sa buntag sa Sarangani Police Provincial Office (SPPO).
Mismong si Sarangani Police provincial director, Senior Supt. Joseph Semillano ang mitunol sa bouquet kang Pastor Bryan Aungon, Provincial Peace Educator ug miyembro sa Provincial Advisory Council sa SPPO, nga gihatag niini sa iyang hinigugma, samtang gipalibutan sila sa mga kaubanang pulis.
Samtang gipatukar isip background ang kanta nga ‘God Gave Me You,’ miluhod nga gipangutana ni Pastor Aungon ug ‘Will you marry me” ang girlfriend. Wala usab mapakyas ang pastor human nga emosyunal nga mitubag ug ‘Yes’ ang hinigugma.
Gikilig usab ang mga pulis sa ilang palibot, kung asa ang uban ang nagsablig pa ug bulak ngadto sa soon-to-be bride and groom.
