GENERAL SANTOS CITY – Gipailawom sa community based drug rehabilitation sa City Social Welfare and Development Office lakip na sa City Health office ang 51 ka mga drug surfacing personalities sa Barangay Dadiangas West dinhi sa dakbayan.
Matud pa ni Kapitan Edgar Acharon sa Barangay Dadiangas West nga interesado ang mga nasampit nga hingpit na nga biyaan ang ilegal nga droga.
Sulod na sa pipila ka semana nga gipailawom sa community based drug rehabilitation ang mga nasampit.
Suportado ni Kapitan Acharon ang programa sa gobyerno gumikan nakunhuran gayud ang mga gagamitan og ilegal nga droga sa iyang barangay nga noted nga daghan ang nalambigit sa ilegal nga droga.
Nasayran ang maong barangay ang kasagarang target sa operasyon sa kapulisan og PDEA gumikan katap ang ilegal nga droga.
Kahibaluan nga ang ubang mga barangay sa syudad ang unang nakahuman na sa walo ka bulan nga community based drug rebalilitation og bag-ohay pa lamang natigayon ang graduation.
Ang maong programa sa LGU-GenSan ang nakaani og interes sa DSWD National Office hinungdan nga giimbtahan aron mamulong kung unsa ang mga gihimo sa mga drug surfacing personalities.
