GENERAL SANTOS CITY – Subli nga nagpahimangno ang buhatan sa Civil Defense sa mga nagpuyo sa mga flood prone area lakip sa mga daplin sa baybay nga dili na hulaton pa nga mudako ang balod una pa ihikling ang ilang pamilya.
Kini human gikumpirma ni Rommel Sinarimbo ang pagbakwit sa 40 ka pamilya o 210 ka mga indibidwal sa Malapatan Municipal Gymnasium human gibanawan sa dagat ang pinuy-anan sa nasampit nga mga residente.
Samtang mukabat sa 47 ka pamilya o 244 ka mga indibidwal usab sa Kiamba nga gikan sa Barangay Nalos, Lagundi ug Kayupo ang mipahawa sa ilang pinuy-anan ug nanghikling sa ilang mga kabanay.
Apan gikabutyag ni Sinarimbo nga gilayon nga nakapauli sa ilang mga panimalay gawas na lamang sa pipila ka nahibilin tungod ang ilang pinuy-anan ang totally damage human mahapakan sa dagkong balod.
Gipaklaro usab sa Opisyal nga dili lamang taga Sarangani ang naapektuhan sa bagyong Paulo tungod may natala nga pagbaha sa Koronadal ug Tupi kung asa gipangdala usab sa Municipal Gymnasium ang mga bakwit.
Ang makusog nga pag-ulan ug paghuros sa hangin ang nakapaguba sa kadalanan sa mga barangay sa Bunao, Cebuano ug Lunen.
Samtang wala pa mihatag ug ihap sa mga nalunod nga fishing bangca tungod nagpadayon ang ilang field validation.
