GENERAL SANTOS CITY – Karong adlawa gikatakdang kasuhan ang kanhing barangay kagawad nga nasikop sa natigayong buy-bust operation sa Purok Masinadiyahon, Brgy. Barrio 1, Banga, South Cotabato, kagahapong adlawa.
Giila ang dinakpan nga si JOSEPH BENES ATENSOR, 37 anyos, minyo, ug residente sa nasampit nga lugar.
Kasong pagsupak sa Section 5 kon pagbaligya, Section 11 kon paghupot, ug Section 12 kon paghupot ug drug paraphernalia, sa Article II sa RA 9165 or The Comprehensive Dangerous Drugs Act of 2002.
Kini human mapalitan ang nasampit ug usa ka sachet sa shabu, sa nagpailang poseur buyer nga pulis, sa kantidad mga usa ka libo ka pesos isip mark money.
Narekober usab sa posisyon ni Atensor ang usa ka gramo sa shabu nga may estimated value nga P5,000, ug mga drug paraphernalia, ug usa ka unit sa cellphone.
Base sa impormasyon sa PDEA-12, watchlisted si Atensor ug dugay nang gimonitor sa mga operatiba. Kasamtangang nakakostudiya ang nasampit sa PDEA 12 Detention Facility.
