GENERAL SANTOS CITY – May kalabutan sa iligal nga droga ang usa sa gitutukang motibo sa mga sakop sa Polomolok Municipal Police Station sa natigayong labing ulahing pagpamusil-patay sa ilang area of responsability.
Kahibaluan nga natigayon kini sa usa ka compound sa Blk 4 Balabat, Poblacion, Polomolok, kung asa dead on the spot ai Albert Suico, hamtong, nga unang gipusil sa gunman samtang anaa sa tindahan sa iyang amo nga si Jeffrey Tan, 36-anyos, nga sunod nga gipusil samtang natulog sulod sa iyang lawak sa iyang panimalay.
Nadala pa sa balay-tambalanan si Tan apan nakabsan sa kinabuhi.
Narekober sa kapulisan sa tindahan ni Tan ang pipila ka sachet sa shabu ug marijuana ug mga drug paraphernalia, gawas pa nga natuki nga usa drug surrenderee si Suico.
Narekober usab ang pipila ka empty shells sa .45 caliber pistol. Sa imbestigasyon, gikabutyag nga tulo ang suspek nga gilangkuban sa gunman, lookout ug ang driver sa getaway vehicle.
Sa karon padayon ang pagpangalap ug dugang impormasyon sa kapulisan, aron mailhan ang mga suspek, ug matumbok ang tinuod nga motibo sa krimen.
