GENERAL SANTOS CITY – Nabalaka karon ang mga inmates sa Bureau of Jail Management and Penology-12 General Santos Reformatory Center gumikan sa taho nga hapit nang mahurot ang budget nila sa pagkaon alang ning tuiga.
Sa pakighinabi sa Bombo Radyo kang Jail Warden Jesus Singson, gibutyag niini nga tungod kini sa dakong pag-usbaw sa ihap sa mga piniriso sa naasoy’ng jail facility nga miabot na sa kapin dos mil.
Nasayran nga may budget nga P60 matag adlaw alang sa pagkaon ang matag piniriso.
Hinuon, gipasalig ni Singson nga paigo pa ang pagkaon sa ilang mga piniriso ning higayuna, ug galaum ug gipaningkamutan nga dili gayud magutman ang mga piniriso.
Padayon usab matud pa ang paglihok sa mga hingtungdang ahensya aron padayong masuportahan ang mga nag-unang panginahanglanon sa mga piniriso partikular na ang pagkaon.
