GENERAL SANTOS CITY – Nakabsan na gayud sa kinabuhi si Jan Rafel Eco, 22-anyos anak sa barangay kagawad sa Brgy. Dadiangas South, nga napusilan sa kapulisan human matud pa misukol atul sa gipahigayon nga buy-bust operation sa City Drug Enforcement Unit kaniadtong Lunes sa gabii, sa Tiongson St. Brgy Lagao.
Wala na makaya sa lawas sa biktima human mabutang sa ICU sa St. Elizabeth Hospital gumikan sa fatal nga samad-pinusilan sa ulo, ug gibakwian sa kinabuhi bandang alas-6:00 sa hapon.
Una nang midepensa ang CDEU nga giunhan nila ug pusil si Eco human matud pa kini miaksyon nga may gibunlot samtang nagmaneho sa iyang multicab, human matud pa misulay ug sibat sa gipahigayong buy-bust operation.
Apan kahibaluan nga hugtanong gipanghimakak sa pamilya sa biktima nga nalambigit kini sa iligal nga droga, ug hugtanong mialma sa nadangatan sa anak.
Ug gani, bisan si Dadiangas South Bgry Captain Alvin Veneracion ang nagkanayon nga wala siyay nasayran nga nalambigit sa iligal nga droga ang biktima, hilabi na sa paghupot ug armas.
Apan matud sa CDEU nga may narekober nga armas sa biktima, luyo nga wala pa gihapon gibutyag kon unsa nga matang sa pusil.
