Kanhi OFW, nakasinati og grabeng trauma human gisulod sa kawatan nga walay sapot
GENERAL SANTOS CITY – Trauma ang gibati sa usa ka kanhing OFW human gisulod sa hubo nga kawatan ang iyang panimalay.
Giila ang biktima nga si Jennifer Dacanine, 27 anyos, residente sa Salvacion, Kawa, Brgy Dadiangas West ning dakbayan.
Natigayon kini kagahapon sa kaadlawon, samtang natulog ang biktima sa iyang lawak, naalimungawan matud pa kini ug nakamata dihang nakita ang usa ka hubo nga lalaki nga bulaw ang buhok, ug gikuha ang iyang cellphone nga nagkantidad ug P20,000.
Una niini, nagtuo matud pa ang biktima nga nagdamgo lang, apan diyang hingpit nang nakamata, kalit siyang misinggit hinungdan nga midagan ang suspek dala ang iyang cellphone.
Miambak matud pa kini sa ilang terrace aron makasibat apan nahagbong ang gikawat nga cellphone ug nabilin sa balay sa biktima.
Gilayong midangop sa Pendatun Police Station ang biktima, ug gipatala ang nahitabo, aron dili na masubli.
