Pinoy sa Las Vegas gibati gihapon ug kahadlok ug kabalaka human ang pagpamusil sa Mandalay Bay Casino
GENERAL SANTOS CITY -Gibati gihapon ug kahadlok ug kabalaka ang Pinoy sa Las Vegas, Nevada, human ang natigayong pagpamusil sa Mandalay Bay Casino kagahapon, nga gikamatay sa kapin 50 ka tawo, ug kapin 500 ang nadala sa ospital.
Kini ang gibutyag sa Bombo Radyo ni Fervyl Cabudoy, usa ka registered nurse nga taga-Norala, South Cotabato, nga gatrabaho sa usa ka ospital sa Las Vegas.
Apan luyo nabalaka sila sa ilang seguridad, apan dako gihapon ang pagsalig nga dili sila pasagdan sa gobyerno sa Nevada, lakip na sa Philippine Embassy.
Sumala pa nga bag-uhay lamang siya nakagawas sa ospital human nagkasakit, ug kasamtangang nagpaayo sa iyang panimalay dihang nahitabo ang insidente.
Apan atua matud pa ang lima niya ka higala sa lugar kung asa nahitabo ang insidente.
Una niini, nahitabo matud pa ang insidente alas-10:30 sa gabii, dihang walay puas nga namusil ang duha ka gunmen gikan sa 27th floor, ngadto sa mga tawo sa ilawom nga mitambong sa Country Music Festival.
Nagpanic ug nagdinaganay matud pa ang mga tawo, kung asa lima sa iyang mga higala ang atua sa lugar dihang nahitabo ang insidente.
Hinuon, paspas matud pang nakaresponde ang mga otoridad ug gilayong gigukod ang mga suspek.
Kahibaluan nga napatay na sa mga kapulisan ang primary suspect nga gikabutyag nga Pinay ang misis.
Luwas usab matud pa ang iyang higala nga gilayong nakapalayo sa lugar.
Samtang, gipapha niini ang kabalaka sa iyang mga kabanay dinhi sa Pilipinas nga nga luwas siya ug walay angayang kabalak-an.
