Deputy chief of police nga gipusil-patay gkatakda nang ihatod sa ulahing kapahulayan
GENERAL SANTOS CITY -Gikatakda nang ihatod sa ulahing kapahulayan sa Tantangan, South Cotabato, si anhing P/S/Insp. Hernan Gabat, deputy chief of police sa Polomolok Municipal Police Station, nga gipusil-patay miaging semana sa usa ka kan-anan sa Polomolok, South Cotabato.
Kini ang gibutyag ni P/S/Supt. Franklin Alvero, provincial director sa South Cotabato Police Provincial Office, sa pakighinabi sa Bombo Radyo.
Kini human matud pa nila nakahinabi ang misis ni Gabat, human sila mibisita sa haya niini.
Samtang, may kalabutan sa nagpadayong imbestigasyon, dili matud pa ma-establisar sa kapulisan ang ilhanan sa mga suspek, hilabi na nga dili matud pa mu-kooperar ang mga testigo.
Apan nagpabiling may kalabutan sa iligal nga droga ang ginatutukan nilang anggulo ug motibo sa insidente, hilabi na nga posibleng daghan gayud ang nasuko kang Gabat, gumikan sa pagka-aktibo niini sa kampanya batok sa iligal nga droga sa Polomolok.
Sa karon mas gipalawman matud pa nila ang imbestigasyon, kung asa padayon pang gina-validate ang mga impormasyon nga ilang nakalap, apan mibalibad una sa paghatag ug unsa mang detalye sa media.
Samtang, gipasalig ni P/S/Supt. Alvero nga gipaningkamutan nila sa nga mahatagan ug hustisya ang pagkamatay ni Gabat.
