GENERAL SANTOS CITY – Laing engkwentro na usab batok sa mga New Peoples Army ang natigayon sa area of responsibility sa 73rd Infantry Batallion Philippine Army.
Matud sa ilang tigpamaba nga si Lt. Daryl Cansancio, natigayon kini sa Brgy Goma sa Digos City, Davao Del Sur.
Milungtad matud pa ug napulo ka minuto ang natigayong engkwentro tali sa ilang ground troops ug mukabat sa 40 ka mga miyembro sa Guerrilla Front 51, ilawom sa pagdumala ni Alyas Mackoy.
Hinuon, wala matud pay nasamdan sa bahin sa kasundaluhan, apan gituuhang daghan ang nasamdan sa mga rebelde gumikan sa daghang mga lama sa dugo nga nakit-an sa encounter site dihang miatras na ang mga nasampit.
Gikabutyag nga nagpahigayon ug pursuit ug combat operation ang kasundaluhan sa naasoy’ng lugar gumikan sa gipadangat nga reklamo sa mga mag-uuma sa lugar, gumikan sa gipahigayong pagpang-harass ug pagpangayo-ngayo sa mga rebelde. Gawas niini, may report usab nga nagkampo na sa lugar ang mga rebelde.
Sa karon nagpadayon ang paggukod sa nasampit nga grupo sa mga rebelde, samtang padayon usab ang clearing recovery operation sa lugar kung asa natigayon ang engkwentro.
