GENERAL SANTOS CITY – Nag-pulic apology pinaagi sa Bombo Radyo, ang organizer sa Mutya ng Pilipinas-SOCCSKSARGEN sa human nga wala nakaapil ang pambato sa rehiyon nga si Rachelle Valerie Pailden sa Mutya ng Pilipinas 2017.
Kini ang tubag ni Mark Esber, human nagdemand ug public apology ang siyam ka mga kandidata, atul sa pag-atubang sa Sangguniang Panglungsod kagahapong adlawa.
Giangkon ni Esber nga gumikan kini sa mga wala niya na-comply nga requirements sa Mutya ng Pilipinas Inc. (MPI).
Ug base matud pa sa nakasabutan nila sa Mutya ng Pilipinas Inc., i-comply na lamang niya ang tanang mga gipangayo nga rekositos, aron mahimo pang makaapil si Pailden sa Mutya ng Pilipinas 2018.
Gikonsidera ni Esber nga “lesson learned” ang nahitabo, nga nagpahigayon ug event nga walay mga paigong rekositos ug kulang ang mga dokumento.
Hinungdan nga sa sunod higayon, gipasalig niini nga siguraduhon na niyang kumpleto ang tanang requirements ug dokumento una magpahigayon ug mag-organize ug mga susamang pageant ug event.
Nangayo usab kini ug pasaylo sa mga higala nga nakabangi tungod sa nahitabo, human mireklamo gumikan daw sa na-scam sila.
Malaumon usab si Esber nga dili mahinayon ang sugyot nga ideklara siyang “persona non grata” sa dakbayan.
