GENERAL SANTOS CITY – Pulos napaig ang lawas sa Inahan ug duha niini ka mga anak sa kalit pagkasunog sa ilang pinuy-anan, Miyerkules sa kaadlawon.
Gikumpirma ni FO3 Macacuna Tumambiling, imbestigador sa Bureau of Fire Protection nga patay na dihang ilang makaplagan ang nagpangalan ug Jovelyn Gamis nga taga Purok 1, Blaan Community Village, Labangal ning dakbayan.
Nakita matud pa ang lawas sa biktima sa kusina nga bahin samtang ang lima ug tulo ka tuig niining anak ang nakuha sa ilang lawak.
Matud ni Tumambiling nga dako na ang kalayo dihang ilang maabtan gani apil nasunog ang mga boarding house sa luyo nga bahin sa panimalay sa mga biktima.
Gawas niini nasunog usab ang internet cafe nga panag-iya sa biktima.
Ang duha ka mga bata ang giila nga silang Earl Mason Cagas singko anyos ug ang manghud niini nga si Shaun Anthony tres anyos ang gidala sa punerarya kauban sa ilang inahan.
Matud ni Tumambiling nga ila pang giimbestigahan kung asa nanukad ang kalayo nga milamoy sa panimalay sa mga biktima.
Usa sa gilantaw nga hinungdan mao ang paggamit ug series connection sa mga panimalay nga posibleng nag-overload.
