GENERAL SANTOS CITY – Gitun-an karon sa mga otoridad kon may kalabotan sa pagpatay kay Leodoro Diaz ang pagka-aktibo niini sa pag-witness sa mga drug operation sa kapulisan.
Matud kay PCI Johani Resurrection, Chief of Police sa President Quirino, Sultan Kudarat, daghang anggulo ang gitan-aw aron sa pagtumbok sa motibo ug usa niini ang pag-uban-uban sa biktima sa mga drug raid.
Nakig-alayon na usab ngadto sa pamilya ni Diaz aron masayran kon aduna bay nakabangi ang nasampit una kini gipusil.
Gidugang pa ni Chief Insp. Resurrection, nangita na sila og mga testigo og gisusi duol sa crime scene kon adunay naka-install nga CCTV camera kon asa posibleng adunay nakuha nga footage sa natigayong pagpamusil.
Ug gani, lead sa kapulisan sa gipahigayong imbestigasyon ang upat ka basiyo sa caliber 45 pistol nga narekober sa gikahitabungan sa pagpamusil.
Una nang gibutyag sa pamilya nga wala silay deya kon kinsa ang responsable sa pagpusil sa ilang minahal sa kinabuhi.
Apan dili limod kanila nga daghan og nakabangga ang ilang padre de pamilya gumikan sa matang sa trabaho niini.
Nasayran nga si Diaz m, usa ka writer sa Manila Bulletin, kolumnista usab sa Sapol Tabloid og reporter sa DXMY- radio station sa Cotabato City.
Gibutyag nga daghang gisulat ang biktima sa mantalaan kabahin sa mga isyu sa droga, kurapsyon og bisan sa mga anomalya sa gobyerno.
