GENERAL SANTOS CITY – Gi-turnover na sa Bula Police Station ngadto sa City Social Welfare and Development Office ang upat ka mga grade 11 students nga nasikop human nasakpan nga nagshoplifting sa usa ka mall ning dakbayan.
Mismong ang mga gwardiya sa Gaisano Mall ang midangop sa nasampit nga presinto ug gipangdala ang upat ka menor de edad, lakip ang mga gikawat nila nga mga assorted goods sama sa tshirt, pantalon ug tsinelas nga nagkantidad ug mukabat sa P5,000.
Gikabutyag nga gisulayan sa mga nasampit nga mugawas sa mall dala ang ilang mga gikawat nga items, apan giharang sa gwardiya ug dihang gipangitaan ug resibo, pakyas nga makapakita, hinungdan nga gipang-hold.
Nasayran nga may klase pa unta kaniadtong tungura ang mga nasampit nga menor de edad nga pulos mga estudyante sa usa ka tulunghaan sa Brgy Lagao, apan nag-cutting classes.
Wala matud pa nakamatikod ang gwardiya sa tulunghaan nga migawas ang mga nasampit, dayon gihubo ang ilang mga uniporme aron dili mailhan nga mga estudyantye. Giindorso na sa WCPD ang kaso batok sa mga nahisgutang estudyante.
