GENERAL SANTOS CITY – Samaron ang driver ug pahinante sa usa ka trailer truck human nabalintong samtang gisubay ang national highway, Prk Lower Riverside, Brgy Matin-ao, Polomolok, South Cotabato.
Natigayon ang aksidente alas-2:00 sa kaadlawon, kung asa nabulag gayud ang ulo sa truck sa iyang trailer kung asa sakay ang tanker, samtang ang driver nga giilang si Freddy Sencio, 26 anyos, ug pahinante nga si Reynaldo Sencio, pulos mga taga-Butuan, ang gidala sa balay-tambalanan dinhi sa dakbayan gumikan sa naangkon nga mga samad.
Matud sa ilang mga kaubanan nga sakay sa laing sakyanan ug igo lamang mibalik sa lugar human nasayran ang insidente, minor lamang nga mga samad ang naangkon sa duruha, luyo nga wasak ang windshield sa nasampit nga truck.
Gikabutyag nga gikan sa Butuan ang maong truck nga usa ka Isuzo Giga nga may plate number nga LYJ 674, ug paingon unta sa Buluan, Maguindanao aron mukuha ug palm oil.
Gituuhang nadakin-as ang sakyanan human nga kalit nga mipreno, hilabi na nga dangog ang dalan gumikan sa kusog nga pag-ulan nga nasinatian.
Nasayran nga tungod sa insidente, mitagas ang dalang krudo sa truck, hinungdan nga kinahanglang pasiritan ug tubig aron dili makaapekto sa uban pang mga motorista.
Giimbestigahan na sa mga otoridad ang naasoy’ng aksidente.
