GENERAL SANTOS CITY – Luyo nga pakyas nga mapabilin ang titulo, sugaton gihapon ug hero’s welcome si Pambansang Kamao Manny Pacquiao, sa iyang paghidangat ning adlawa sa Gensan.
Kini human ang away kang Jeff Horn sa Brisbane, Australia, kung asa ang Australian boxer ang maoy gideklarang midaog.
Gibutyag ni Lady Manalo sa city sports division nga andam na ang lokal nga panggamhanan sa General Santos alang sa mga aktibidad nga ipahigayon kalabot sa pag-abot sa fighting senator.
Gilaumang muabot ang Team Pacquiao sakay sa usa ka charterd plane unyang hapon.
Sama sa naandan, gilaumang sugaton si Pacquiao sa Gensan International Airport sa mga opisyal sa LGU-Gensan ug Sarangani, ug may ipahigayong airport reception, motorcade ug presscon.
Kahibaluan nga daghan ang dismayadong mga kababayan ni Pacquiao sa nahimong desisyon sa mga judges, gumikan tataw matud pa nga kini ang midaog ug dili si Horn.
Apan mibuhos gihapon ang pagtimbaya alang sa fighting senator alang sa maayong away nga gipakita.
