GENERAL SANTOS CITY –Nagmalampuson ang gipahigayon nga clean-up drive sa merkado publiko sa syudad.
Gipangunahan kini sa mga konsehal sa dakbayan nga silang Kagawad Rosalita Nuñez og Kagawad Beth Bagonoc.
Kaabag usab sa paghinlo ang mismong mga taga palengke ilabina kadtong mga nagtinda sa isdaan, mga batan-on gikan sa Brgy. Fatima, og mga personahe sa BFP-GenSan, CCU og daghan pa.
Sa pakighinabi kay Kag. Bagonoc, gibutyag niini nga ang clean-up drive kagabie aron ipakita nga matinud-anon ang konseho sa resolusyon nga giaprubahan nga gahangyo sa public market administrator nga limpyohan ang palengke.
Giangkon sa opisyal nga dili na ma-agwanta ang kabaho og kahugaw sa lugar. Matud pa suportado kini sa mayor.
Samtang, gibutyag ni Kag. Nuñez, responsilibilidad sa syudad og mga gabaligya sa palengke ang paghinlo.
Kahibaluan nga ubay-ubay nga reklamo ang nadawat sa konseho kalabutan sa hilabihan kahugaw og nagbara nga kanal gumikann sa gilabay nga mga plastic ug kaliskis sa isda gawas pa sa dili maayong baho partikular sa isdaan.
