GENERAL SANTOS CITY – Nakaginhawa na ang pamilyang Dalquez, human nga natangtang na sa death row didto sa United Arab Emirates kon UAE ang Pinay DH nga si Jennifer Dalquez, ang OFW nga nabilanggo ug unang gisintensyahan ug silot-kamatayon, human mapatay ang employer nga misulay ug lugos kaniya.
Base sa report, gipaabot na lamang karon sa gobyerno sa Pilipinas ug pamilyang Dalquez, ang pagpanaog sa desisyon sa korte sa nasampit nga nasud sa umaabot nga Hunyo 19, alang sa kon unsa ang mamahimong desisyon alang kang Jennifer, kon kinahanglan na lamang mabilanggo, mubayad ug blood money, o kon tugtan nang makauli dinhi sa nasud.
Malaumon karon ang pamilyang Dalquez nga tugtan nang makauli sa nasud ang nasampit nga OFW, hilabi na nga naserbisyuhan na matud pa niini ang silot nga pagkabilanggo sulod sa pipila na ka tuig.
Nasayran nga padayong ginaapela sa Department of Foreign Affairs kon DFA didto sa nasampit nga nasud ang kalabot sa kaso ni Dalquez, kung asa gipaningkamutan nga mapawalay-sala kini sa kaso, hilabi na nga igo lamang gidepensahan ang kaugalingon, ug aron mapauli sa nasud sa labing daling panahon.
