GENERAL SANTOS CITY – Usa ka dakong kadungganan alang sa Australian boxer nga si George Kambosos Jr. ang mahimong sparring partner ni eight division world champion ug Sen. Manny Pacquiao.
Sa pakighinabi sa Bombo Radyo, gihulagway niini ang Pinoy ring icon isip “all-time great” hinungdan nga dakong butang alang kaniya ang pagka-spar mate niini alang sa umaabot nga away, luyo nga kababayan niya ang makaatbang niini nga si Jeff Horn.
Ug gani, buot matud pa niyang sundon ang mga tunob ni Pacquiao ug buot usab niyang makab-ot ang naabot nga kalampusan niini.
Gatuo usab ang nasampit nga ma-knockout ni Pacquiao si Horn sulod sa sixth round sa away.
Samtang, bisan ug siguradong masuko kaniya ang mga kababayan sa Australia gumikan gitabangan ang kaatbang sa iyang kababayan nga si Jeff Horn, apan kang Pacquiao gihapon matud pa siya mudapig.
Ug gatuo siya nga ang fighting senator ang maoy mudaog sa umaabot nga away sa Hulyo 2.
Kahibaluan nga si Kambosos mao ang WBA Oceania lightweight champion, ug numero uno sa Australia ug numero 9 sa World Boxing Association, samtang si Pacquiao ang kampeon sa WBO welterweight, samtang si Horn ang anaa sa ikaduhang pwesto.
