GENERAL SANTOS CITY – Gikansela sa Court of Tax Appeals (CTA) ang P1.4-million tax liability ni Dionisia Pacquiao, inahan ni eight division world champion ug Senador Manny Pacquiao.
Kini human matud pa nasupak sa Bureau of Internal Revenue (BIR) ang iyang katungod alang sa due process. Base sa 26 ka panid nga desisyon nga may petsa nga May 30, gitugtan sa CTA Second Division ang petition for review ni Mommy D sa January 2015 final decision on disputed assessment (FDDA), nga giisyu ni kanhing Revenue Region 18 Director Thelma Milabao.
Una nang gibasura sa FDDA ang protesta ni Pacquiao batok sa income tax and value-added tax assessments niya alang kaniadtong 2010.
Apan gi-invalidate sa CTA ang tax assessments gumikan nakita sa record nga wala nahatagan si Pacquiao sa preliminary assessment notice (PAN) nga may petsa nga Sept. 16, 2013, nga mao untay nagpahibalo kaniya kalabot sa gialegar nga tax deficiency. Usa ka Analyn Abrera ug dili si Pacquiao ang nakadawat sa maong notice kaniadtong Oct. 18, 2013,apan napakyas ang BIR nga ma-establisar ang relasyon o kon unsa niya si Mommy D.
Ug bisan kon insaktong nasilbi ang PAN, gibasol gihapon sa korte ang BIR gumikan sa wala paghatag kang Pacquiao ug kahigayunan aron tubagon ang notice.
Kini gumikan parehong giisyu sa BIR ang final assessment notice ug final notice of demand kaniadtong Oct. 16, duha ka adlaw una sa gikatakdang p agdawat ni Pacquiao sa PAN.
Ang tax case ni Mommy D nga gipasang-at kaniadtong 2013, ang usa ka offshoot sa P3.299-billion tax case nga gipasang-at sa BIR batok sa iyang anak nga si Senator Manny, ug misis nga Jinkee.
