GENERAL SANTOS CITY – Miusbaw na ngadto sa 200 ka mga estudyante gikan sa Marawi City ang nakapa-enroll sa nagkalain-laing pampublikong tulunghaan sa Rehiyon 12 sukad kaniadtong Lunes, Hunyo 5, 2017.
Kini ang gikumpirma ni DepED Region 12 Regional Director Dr. Arturo Bayocot.
Sumala pa nga ang nahisgutang ihap sa mga transferees ang nadawat sa regional office gikan sa nagkalain-laing division.
Sa siyudad sa Cotabato, mukabat matud pa sa 50 ang nakapa-enroll gikan sa Marawi City, gisundan sa Sultan Kudarat division na anaa sa 40 ug ang uban pang mga estudyante ang anaa sa siyudad sa Koronadal, General Santos ug probinsya sa South Cotabato.
Dugang pa sa opisyal, mudawat ug mga transferees gikan sa Marawi City ug Lanao del Sur ang nagkalain-laing tulunghaan sa Region 12 hangtod Hunyo 30, 2017 bisan ug walay dokumento ug ID nga mapresinta.
Dungan niini, giawhag ni Bayocot ang mga ginikanan sa mga estudyante nga wala pa nakapa-enroll hilabi na ang mga bakwit nga makig-alayon sa labing duol nga mga pampublikong tulunghaan sa ilang lugar.
Nasayran nga mukabat sa 1,096,320 ka mga estudyante ang nakapa-enroll gikan sa siyam ka division sa tibuok rehiyon.
