GENERAL SANTOS CITY – Hugtanong gipanghimakak sa 17 anyos nga suspek ang reklamo nga iyahang gilugos ang 13-anyos nga ka-textmate.
Kini human nasikop ang suspek nga si Alyas Jake, taga-Lanao Del Norte ug temporaryong nagpuyo sa iyang igsuon nga nag-board sa Brgy Dadiangas North ning dakbayan.
Kahinumduman nga nagkatensyon pa sulod sa Pendatun Police Station gumikan sa tumang kasuko sa magulang sa biktima nga si Alyas Ann, taga-Brgy Apopong ning dakbayan, ug gikinahanglan pa kining posasan sa kapulisan aron mapakalma.
Nasayran nga natigayon ang insidente kaniadting adlaw’ng Martes sa udto. Matud ni Alyas Jake, nakasabutan nila ni Alyas Ann nga magkita lakip ang ilang gihimo sulod sa boarding house sa iyang magulang gumikan wala kini mipalag dihang ilang gihimo ang sa ingon.
Giaresto ang nasampit sa kapulisan nga menor de edad pasado alas-7:00 kagabii, kung asa karon gihikay na sa kapulisan ang mga dokumento alang sa pagpasang-at ug kaso batok sa suspek.
