GENERAL SANTOS CITY – Wala nakadalikyat si eight division world champion ug Senator Manny Pacquiao sa pagsaulog sa ika-68 nga adlaw’ng natawhan sa iyang inahan nga si Mommy Dionesia, kagahapong adlawa.
Matud ni Mommy D, na-busy si Manny sa dili mabiyaan nga trabaho sa Senado lakip na sa training alang sa umaabot nga away sa Hulyo.
Apan bisan paman, nakasabot matud pa si Mommy D, gumikan kanunay usab matud pang gatawag kaniya ang fighting senator aron kumustahon ang iyang kahimtang, hilabi na nga nakasinati kini ug sakit ug medyo galuya.
Hinuon, kahinumduman nga Dominggo pa lamang sa gabii nakadawat na si Mommy D ug bulak ug tsokolate gikan kang Manny.
Samtang, daw sa nahimong “Lady in Red” si Mommy Dionesia sa natigayong simpleng bidthday celebration niini.
Luyo sa iyang sakit ug medyo galuya pa, blooming gihapon kini sa sul-ob niining pula gikan sa blouse, palda ug shaol, lakip na ang sandals ug mga kuko sa kamot ug tiil nga pula usab.
Kagahapon sa hapon nagpahigayon ug misa sa kapilya niini nga gitambungan sa iyang pamilya, mga paryente ug suod nga mga higala, nga gisundan sa simpleng salu-salo.
Luyo nga medyo nangluya pa, nadasig ang birthday celebrant sa mga nadawat nga pagtimbaya ug pag-ampo gikan sa iyang mga anak ug uban pang mga nagmahal kanila.
Samtang, bouquet sa pula ug puti nga rosas usab ang nadawat nga regalo ni Mommy D gikan sa hinigugma.
