GENERAL SANTOS CITY – Kapin 100 ka mga residente ang nahimong apektado sa Maribulan, Alabel, Sarangani gumikan sa nasinatiang pagbaha.
Kahinumduman nga alas-12:00 pa lamang miaging gabii namakwit na ang pipila ka nga residente human mitaas ang tubig sa ilang mga panimalay, gumikan sa pagtaas ug pagkusog sa bul-og sa tubig.
Pagka-kaadlawon miabot ang tubig-baha sa abaga sa tawo, human milapaw ang tubig gikan sa Buayan ug Maribulan River.
Ug gani, matud ni Kag. Ricky Buday atul sa interview sa Bombo Radyo, nakuyawan sila human nga miabot kutob tuhod sa highway samtang abot sa dughan sa sentrong bahin sa barangay. Samtang naabot sa tubig ang mga kasagingan ug kalubihan.
Kahibaluan nga kadali nga gidid-an una ang mga motorista nga muagi sa taytayan gumikan sa pagtaas sa tubig-baha, apan sa kaulahian gitugtan na nga makalahos.
Hinuon, anam-anam nang miubos ang tubig hangtod pagha-hapon, kung asa pipila ka mga residente na ang nakabalik sa ilang tagsa ka panimalay.
Sa pagkakaron, gipaabot pa ang assessment report sa mga opisyal sa barangay alang sa kinatibuk-ang ihap sa mga naapektuhang residente tungod sa baha.
Bisan paman, nagpabiling nakaalerto ang mga residente sa naasoy’ng lugar, gumikan sa nasinatiang mga pagdag-um ug pag-ulan sa naaso’ng probinsya bisan dinhi sa dakbayan ug mga kasikbit lugar.
