GENERAL SANTOS CITY – Balhug sa Bula Police Station ang usa ka lalaki human gidunggab ang iyang manghod.
Giila ang suspek nga si Elmer Manahay, 46 anyos, residente sa Royeca Brgy Bula ning dakbayan, samtang ang biktima giilang si Ernie, 43 anyos.
Matud sa ilang pag-umangkon, bag-uhay lamang nahuman ang ilang reunion kung asa nag-istoryahanay matud pa ang duruha kauban ang usa pa ka lalaki nga igsuon.
Misangko matud pa sa pagbiniklanay ang naasoy’ng panag-istorya hangtod nga nagsumbaganay.
Milakaw matud pa ang suspek ug mibalik nga may dala nga kutsilyo.
Gisugat matud pa sa biktima ang suspek hinungdan nga nakahigayon kini nga dunggabon ang manghod.
Gilayong gidala sa balay-tambalanan ang biktima human nakaangkon ug samad-dinunggaban sa likod nga bahin sa hawak.
Samtang, desidido ang ilang mga kabanay nga ipabilanggo ang suspek, hilabi na nga problema matud pa kini sa ilang lugar tungod kanunay’ng magmaoy.
