GENERAL SANTOS CITY – Nakasinati ug intensity 2 nga pagtay-og ang dakbayan sa Heneral Santos kagabii.
Batay sa Philippine Institute of Volcanology and Seismology kon PhiVolcs, dungan kini sa nasinatiang 3.7 magnitude sa Maasim, Sarangani, alas-6:46 kagabii.
Natala ang sentro sa linog 23 kilometros sa habagatang kasadpang bahin sa naasoy’ng lugar, sa gilawmon nga 27 kilometros. Tectonic kini in origin, kung asa nasinatian usab ang intenisty 3 nga pagtay-og sa Alabel, Sarangani.
Hinuon, walay natala nga nasamdan o kaha mga propiedad nga naguba tungod sa naasoy’ng pagtay-og.
Wala usay natala nga aftershocks. Kahibaluan nga ala-1:06 usab kagahapon sa hapon dihang natala sa PhiVolcS ang 3.6 magnitude sa Sarangani, Davao Occidental.
Natala ang sentro niini sa 83 kilometros sa amihanang sidlakang bahin sa naasoy’ng lugar, sa gilawmon nga 67 kilometros.
Tectonic usab kini in origin, apan wala usay natala nga nasamdan o kaha mga propiedad nga naguba tungod sa naasoy’ng pagtay-og, ingon man mga aftershocks.
