GENERAL SANTOS CITY – Gikondena ni Juduth Janiola sa City Population Management Office ang nahimong komedya ni Senador Tito Sotto kalabot sa mga single nga inahan.
Sa pakighinabi sa Bombo Radyo, gibutyag ni Janiola nga dako kini nga isyu gumikan dili kini maayong himuong lang nga kataw-anan hilabi na kon mayatakan ang katungod sa usa ka babaye.
Sumala pa nga isip usa ka opisyal sa gobyerno, dili angayang biay-biayan ang susamang mga isyu, inay angayang lakip nga manguna ang senador nga mag-promote sa empowerment sa mga kababainhan, lakip na ang mga single nga inahan.
Tambag pa ni Janiola sa senador, una magpagawas ug pahayag, angayang huna-hunaon una ug siguruon nga walay masakitan nga isig-kaingon.
Dungan niini,giawhag ni Janiola ang publiko nga ikondena ang gihimo ni Sen. Sotto.
Dismayado usab si City Councilor Lourdes Casabuena sa gihimo ni Sen. Sotto.
Sumala pa nga wala siya nagdahum nga ingon-atuhon lamang sa senador ang mga kababainhan.
Masuk-anong gibutyag pa ni Kag. Casabuena nga usa kadto ka “demeaning” ug maka-insulto alang sa mga kababainhan, nga daw gipakamenos lamang sa nasampit.
Plano karon sa nasampit nga konsehal nga hisgutan sa sesyon sa Sangguniang Panglungsod sunod semana ang kalabot sa pagkondena sa maong pahayag sa senador.
