GENERAL SANTOS CITY – Patay ang usa ka waiter sa restaurant human nga naghikog sulod sa kuwarto sa giabangan niining boarding house sa Corner Tieza and Pill Street, sa Brgy. Dad. North ning dakbayan.
Giila ang biktima nga si Rogelio Chavez Bahura, 24, adunay live-in-partner, lumad nga taga Kayopo Kiamba Sarangani Province.
Matud ni P/C/Insp. Jovenson Bayona, alas 11:20 mireport sa ilang presinto si Jonnel Lasaca Gepolano, 20, residente sa Prk. Intik Mabuhay ning dakbayan human nga nakaplagan nga nagbitay sulod sa kuwarto ang kauban niya sa trabaho nga si Bahura og wala nay kinabuhi.
Gihikot sa biktima ang nylon sa iyang liog og dayon gibitay ang kaugalingon. Basi sa impormasyong nakuha sa kapulisan sa ka-boardmate sa biktima, gibutyag ni Roldan Alabado Arellano nga alas 11:00 sa gabie niadtong Abril 29, nag-istorya kaniya ang biktima kalabot sa dili maayong relasyon ngadto sa kapuyo niini nga si Jane Garcia Libre nga taga Malungon.
Giangkon sa biktima nga nagselos sa kapuyo human nga nakaabot sa iya ang istorya nga aduna matud pay relasyon sa ubang lalaki..
Nasuta nga adunay anak nga babaye ang mag-live in partner kon asa nagpangidaronn ug lima ka bulan pa lamang.
Basi sa imbestigasyon sa Pendatun Police station nga walay foul ang kamatayon sa waiter tungod intact ang tanan niining gamit sulod sa iyang kuwarto.
