GENERAL SANTOS CITY – Nag-atang ang pamilya ug mga kababayan sa Pinay DH nga si Jennifer Dalquez, dinhi sa GenSan, kon mahinayon o dili ang pagpahamtang ug silot-kamatayon sa nahisgutang OFW.
Kini gumikan ning adlawa, Abril 12, gikatakdang ipakanaog ang desisyon sa Al Ain’s Criminal Court of First Instance didto sa UAE, kalabot sa apela sa gobyerno sa Pilipinas, kalabot sa sentensya nga silot-kamatayon batok kang Dalquez, human mapatay ang iyang Emirati employer kaniadtong 2014, human siya gisulayan nga luguson.
Malaumon ang tanan, hilabi na ang pamilya Dalquez, nga mamahimong pabor kang Jennifer ang ipanaog nga desisyon sa korte, ug maluwas kini sa silot nga bitay.
Kahinumduman nga wala nahinayon miaging bulan ang pagbitay kang Dalquez gumikan wala una nagpagawas ug desisyon ang korte, human nga usa sa mga anak sa biktima ang wala nakatambong sa pagdungog ug gipaabot pa ang desisyon nila kon ihinayon ang pagpahamtang ug silot nga bitay, o kon mangayo na lamang ug blood money.
Kahibaluan nga una mibiyahe sa Middle East si Pangulong Rodrigo Duterte alang sa iyang state visit sa tulo ka nasud, daghan ang misugyot nga tabangan sa pangulo si Dalquez, pinaagi sa personal nga pag-apela sa kaso niini.
