GENERAL SANTOS CITY – Gikalipay ni South Cotabato Rep. Pedro Acharon Jr. ang pagbasura sa Sandiganbayan 7th division sa kasong katiwalian nga iyang giatubang.
Sa eksklusibong pakighinabi sa Bombo Radyo, gibutyag ni Cong. Acharon nga acquitted na siya sa kaso dungan paghingusog nga wala siya nanghilabot sa pondo sa gobyerno.
Nauna nang giakusahan sa prosekusyon nga misupak sa balaud si Acharon tungod gihatagan niini og travel authority ang mga miyembro kaniadto sa Sangguniang Panglungsod nga silang Jose Orlando Acharon og Minda Atendido.
Hinuon, giklaro ni Cong. Acharon nga wala siya nikuyog sa pag-adto sa US. MIbiyahe silang Acharon og Atendido paingon Los Angeles, California niadtong June 9-16, 2006 aron mutambong sa usa ka dinner show og sa Tambayayong Festival sa California, USA human sa imbitasyon sa Filipino community.
Apan sukwahi matud pa kini sa kamanduan sa kaniadto kalihim sa DILG nga nag-disapproved sa biyahe sa duha. Unawarranted benefits usab matud pa ang gihatag ni Acharon sa duha ka SP members.
Apan sumala sa korte, pakyas ang prosekusyon nga pamatud-an ang akusasyon kay Acharon.
Mensahe ni Cong. Acharon sa mga katawhan sa South Cotabato og sa GenSan nga klaruhon ang unsa mang istorya og dili gilayon mutuo.
Tungod sa pag-dismiss sa kaso, gipabalik sa korte sa kongresista ang iyang cash bond og lifted na usab ang Hold Departure Order batok kaniya.
Nasayran nga tungod sa maong kaso, nasuspenso og 60-diyas si Cong. Acharon.
