GENERAL SANTOS CITY – Mas nahimong aktibo ang kapulisan karon nga nabalik na kanila ang kampanya batok sa iligal nga droga pinaagi sa Double Barrel Reloaded.
Matud ni Police Supt. Lauro Espida, tigpamaba sa General Santos City Police Office, nakaayo usab ang temporaryong pagpahulay nila kaniadtong miaging mga bulan sa maong kampanya gumikan karon mas nahimong aktibo na sila. Ug gani, kagahapong adlawa, Dominggo, 100 ka surrenderee matag station ang gihatag nga quota kanila gikan sa PRO-12.
Sumala pa nga gi-upgrade lamang ang unang hugna sa anti-drug campaign nila, ug ang kalahian lamang tungod kaniadto wala gikonsidera ang mga religious groups.
Apan karon gikinahanglan gayud ang presensya sa mga religious leaders o representante nila matag magpahigayon ug tokhang aron mapamatud-an nga ginapatuman nila sa insakto ang operasyon.
Kahinumduman nga una nang gisaad ni PNP Director General Ronald ‘Bato’ dela Rosa nga dili mamahimong hilabihan ka maduguon ang Double Barrel reloaded, inay mas daghan ang masikop itandi sa mapapatay.
