GENERAL SANTOS CITY –Nakig-alayon na sa City Sports Division sa Civil Aviation Authority of the Philippines kon CAAP-GenSan kalabot sa heros welcome nga ihatag sa lokal nga panggamhanan alang kay GenSan boxer Romero “Ruthless” Duno.
Kini human nga nahimong kampeon si Duno sa ilang away ni Christian “Chimpa” Gonzales sa Los Angeles, California miaging semana kon asa naangkon niini ang World Boxing Council (WBC) Youth Intercontinental lightweight belt.
Kahibaluan nga gideklara gilayon sa referee nga si Thomas Taylor nga daog ang pinoy boxer atol sa 57 seconds sa second round tungod nalisdan na si Gonzales nga mutindog human nga naigo sa solidong kinumo ni Duno.
Apan sa unang round pa lamang gipatumba na ni Duno ang maong mehikanong kaatbang. Una nang gibutyag ni Lady Manalo sa City Sports Division nga sa Marso 22, adlaw’ng Miyerkules na muabot si Duno kon asa nga nangandam na usab ang syudad alang sa ipahigayong hero’s welcome.
Human sa pagsugat, mulahos ang nasampit sa City hall alang sa posibleng paghatag og pasidungog.
