GENERAL SANTOS CITY -Gikumpirma ni Lt. Daryl Cansancio, tigpamaba sa 73rd Infantry Batallion Philippine Army nga gibuhian ang barangay kagawad nga si Kag. Luis Angos sa Brgy Little Baguio, Malita, Davao Occidental, nga gidagit sa mga rebeldeng New Peoples Army.
Una niini, miaging adlaw, samtang nagpahigayon ug mga kalingawan sa ilang sitio, kalit matud pang miabot ang mga suspek nga gipangunahan matud pa ang naasoy’ng grupo ni alyas Kokoy, subleader ni Alyas Dong sa Guerilla Front 71.
Mukabat matud pa sa 20 ka mga armadong kalalakihan ang midagit sa nasampit nga kagawad ug gidala kini sa Lamsalu, Upper Suyan, Malapatan.
Human niini, may miabot matud pang sulat sa barangay gikan sa mga rebelde ug nagdemand nga ang kapitan ang maoy mukuha kang Kag. Angos, dungan sa hangyo nga hatagan sila ug mga armas ug salapi, bugti sa kagawasan ni Kag. Angos.
Ug wala magdugay gibuhian ang biktima, hinundgan nga dako pagtuo sa kasundaluhan nga may natigayon nga binayranay nga pagbayad ug ransom nga mukapin o kulang sa P80,000 isip ransom.
Hinungdan nga hugtanong gikondena sa mga kasundaluhan ang naasoy’ng insidente gumikan mao matud pa kini ang ginahimo sa mga rebeldeng NPA, aron sayon nga hulgaon ang mga resident ug mahatag ang ilang mga hangyo.
