GENERAL SANTOS CITY – Nanawagan karon si Police Inspector Jun Delco, hepe sa Tupi Municipal Police Station ngadto sa adunay kasayuran sa pagpamusil-patay sa barangay tanod sa ilang area of responsibility nga makig-alayon gilayon sa ilang presinto.
Sumala sa opisyal, padayon ang gihimo nilang hugot nga imbestigasyon sa insidente.
Gibutyag ni Police Inspector Delco, angayang mahatagan og hustisya ang biktimang si Dominador Malida, 45 anyos, residente sa Palian, Tupi, South Cotabato. Sa pagkakaron, blangko gihapon ang maong presinto sa motibo ug ilhanan sa mga suspek sa krimen.
Kahibaluan nga natigayon ang pagpamusil samtang ang biktima anaa sa bilyaran nga gipanag-iyahan sa kapitan sa nasampit nga barangay.. Subay sa mga testigo, motorcycle-riding criminals ang mga suspek apan wala nila mailhan.
Samtang, nakagawas na sa ospital si Erwin Salvador human nga naigo sa saag nga bala atol sa maong shooting incident.
