GENERAL SANTOS CITY- Saulogon ugmang adlawa, Marso 9, Huwebes ang World Kidney Day.
Matud ni Dr. Mylene Escalona Lucero, usa ka neprologist kon espesyalista sa kidney dinhi sa dakbayan, usa kini ka global awareness campaign, sa tema nga “Healthy Lifestyle for Healthy Kidneys”, alang sa pagpakatag ug awareness sa kamahinungdanon sa pag-amping ug paghatag ug bili sa kidney.
Dugang pa ni Dr. Lucero nga mahinungdanon matud pa kini gumikan hilabihan na ka taas ang ihap sa mga tawo nga may chronic kidney disease kon CKD, sa tibuok kalibutan.
Ug gani, usa matud pa sa matag 1o ka tawo sa kalibutan ang may CKD, hinundgan nga kinahanglan gayud ug awareness.
Nasayran nga ang CKD mao pagkadaot sa kidney ug dili na matambalan, hinungdan nga magkinahanglan gayud ug tibuok kinabuhi nga medikasyon.
Hinungdan nga atul sa World Kidney Day, gapahigayon ug pag-edukar sa katawhan kalabot sa unsa makalikay ang mga sakit sa kidney.
Kahibaluan nga ang obesity kon hilabihang katambok ang usa sa hinungdan sa pag-angkon ug problema sa kidney.
Alayun sa maong kasaulogan, nagkadaiyang aktibidad ang ipahigayon sa dakbayan.
