GENERAL SANTOS CITY – Anaa na sa luwas nga kahimtang ang walo ka bulan nga batang masuso human naangin dihang gitigbas ug gilungguan ug ulo ang inahan sa bayaw niini.
Kini human nakaangkon ug samad sa suwang ug tudlo, human gitigbas ang inahan niini sa suspek nga si Nickel Talino, 20 anyos, residente sa Sitio Matamis, Demolok, Malita, Davao Occidental.
Kasamtangang naka-hospital arrest usab human gisulayan ug gulgol ang iyang liog, human gihimo ang krimen.
Kahinumduman nga gitigbas sa nahisgutan ang biktima nga si Gemma Bedania, 21 anyos, samtang nagpasuso sa iyang anak, hinungdan nga naputol gayud ang ulo hinungdan sa iyang gilayong nakabsan sa kinabuhi.
Nasayran nga ang inahan unta sa suspek ang iyang unang gipuntirya apan nakasibat hinungdan nga si Bedania ang maoy iyang gipahimungtan.
Sa karon kasamtangang gihaya ang patay’ng lawas sa biktima sa Sitio Dalamuan, Lutay, Malungon, Sarangani.
Gikabutyag nga paabuton una sa ilang mga kabanay nga malubong ang biktima una magsabot kalabot sa himuong aksyon batok sa suspek nga una nang gikabutyag nga nakasinati ug depresyon.
