GENERAL SANTOS CITY – Ning adlawa na gikatakdang muuli ang mga delagado sa GenSan nga miapil sa bag-uhay lamang natapos nga SOCCSKSARGEN Regional Athletic Association (SRAA) Meet nga natigayon sa Amas, Kidapawan.
Kahinumduman nga pakyas ang GenSan Team nga mabakwi gikan sa South Cotabato ang kampeonato ug subling nag-first runner-up. Matud ni Celso Tingson, DepEd-GenSan sports coordinator, nalupigan gayud sa South Cotabato ang GenSan hilabi na sa elementary level, partikular na sa athletics.
Hinuon, kampeon matud pa ang GenSan sa basketball secondary, volleyball secondary, futsal (men’) secondary, ingon man sa swimming sa elementary ug secondary level.
Nadepensahan usab matud pa sa GenSan boxing team ang kampeonato, kung asa nakakuha ug duha ang gold, duha silver ug usa ka bronze.
Samtang, gihingusgan ni Tingson nga nabuhong sa pagkaon ug meryenda ang mga atleta atul sa torneyo ug mahalon nga tubig usab ang ilang gipa-inom sa mga atleta.
