GENERAL SANTOS CITY – Nagpabiling blangko ang kapulisan sa ilhanan sa suspek sa pagpusil sa usa ka college student sa Mindanao Polythecnic College nga natigayon sa Saging St. Brgy Dadiangas North ning dakbayan.
Kahibaluan nga ang biktima ang kasamtangang nagpaalim pa sa balay-tambalanan human nakaangkon ug samad-pinusilan ilawom sa dalunggan, ug nabutang pa sa makuyaw nga kahimtang.
Giila kini nga si Chester Vonn Ortega, 19 anyos, taga Poblacion, Glan, Sarangani.
Matud kang Alyas Ann-Ann nga nakauban sa biktima atul sa insidente, wala gayud niini nailhan ang suspek gumikan ngit-ngit usab sa lugar dihang natigayong ang krimen.
Wala usab matud pa kini nasayran nga kaaway sa biktima, hinungdan nga wala pa usay matumbok nga motibo sa krimen.
Gitun-an pa karon sa kapulisan ang naasoy’ng kaso aron mailhan ang suspek ug matumbok ang motibo sa pagpamusil.
