GENERAL SANTOS CITY – Gipasalamatan sa kapulisan sa Polomolok ang duha ka field workers sa plantasyon ug pinya nga mipadangat ug taho kalabut an sa pagkakaplag sa bag-ong lubong sa kapinyahan nga bahin sa Maligo Polomolok.
Gisubay matud pa sa duha ka trabahante ang waterways dihang nakita ang mihulpa nga yuta hinungdan nga ilang gisusi apan dihang gisulayan ug kotkot didto matud pa nasimhutan ang baho.
Dihang gisugdan ug kotkot sa kapulisan gilayon nga nakita ang tiil sa biktima.
Gikumpirma ni Police Sr,. Instr. Hernan Gabat nga nagpabilin nga Mister X ang biktima nga may samad pinusilan sa likod nga bahin sa lawas ug naa karon sa usa ka punerarya.
May sul-ob kining shorts ug walay sapot nga gibanabanaang trenta anyos ang pangidaron.
Gikumpirma usab niini nga wala pa mibalik kadtong nagpatala sa ilang buhatan ug nangita ug lalaki nga myembro sa ilang pamilya.
Gituhu-an pang adunay kasuko ang mipatay sa lalaki tungod giputos ug packaging tape ang ulo niini samtang nakagapos ang mga kamot.
Pagbana-bana pa sa opisyal nga duha ka pye lamang ang gilubngan sa biktima.
