GENERAL SANTOS CITY – Blangko pa ang mga sakop sa Polomolok Municipal Police Station kalabot sa ilhanan sa motorcyle-riding criminals nga mitulis ug mipusil-patay sa usa ka lending collector.
Padayon matud pa sa pagpangalap ug impormasyon ang kapulisan ug ang hot pursuit operation batok sa mga suspek aron mahatagan ug hustisya ang biktima nga giilang si Bernardo Nosado Jr., 22 anyos, taga Brgy San Isidro ning dakbayan, apan nagtrabaho sa usa ka lending company sa Polomolok.
Base matud pa sa usa ka nakasaksi sa krimen, dihang pahawa na unta ang biktima sa usa ka establisyimento nga gikolektahan, kalit miabot ang mga suspek sakay sa motorsiklo dayon gitiunan ug pusil si Nosado dungan sa pagdeklara ug holdap.
Hinuon, wala na matud pa mipalag ang biktima ug gihatag na lamang gilayon ang iyang sling bag nga gisudlan sa koleksyon, apan dihang nakuha na sa mga suspek, kalit matud pang gipusil ang biktima sa ulo gamit ang wala matinong armas, dayon paspas nga misibat.
Wala nakuha sa mga suspek ang laing cash nga nagkantidad ug kapin P18,000 nga anaa sa bulsa sa biktima.
Sa karon hustisya ang singgit sa pamilya sa biktima alang sa gipatay nga mahal nila sa kinabuhi.
