GENSAN – Anaa na lamang sa 904 ka slots ang nahabilin para sa mga interesadong magkuha og traysikol franchise sa Dakbayan sa General Santos.
Sumala kang Atty. Jong Gonzalez, hepe sa Public Safety Office (PSO) Gensan, padayon pa ang pagdawat sa ilang buhatan sa mga aplikante, apan klaro niyang gipahimangno nga kung mahurot na ang gitakdang slots, isarado dayon ang franchising ug wala na’y kahigayonan ang mga wala nakaapas nga makakuha pa og prangkisa.
Duagang pa nga ang limitasyon sa ihap sa tricycle franchise kabahin sa paningkamot sa siyudad aron mapadayon ang hustong regulasyon sa trapiko, kaluwasan sa pasahero, ug kaayohan sa mga drayber. Gidasig usab niya ang mga interesadong aplikante nga magdali sa pagproseso sa ilang papeles aron dili mahutdan og slot.
Gipahimangnoan usab sa PSO nga ang mga nag-operate og tricycle nga walay balido nga franchise o wala pa gilukat ang ilang prangkisa mapasakaan og multa ug mapahunong sa operasyon, subay sa mga ordinansa sa siyudad.
Sa karon, nagpaabot ang PSO nga mosaka pa ang ihap sa mga aplikante sa mosunod nga mga adlaw, busa gidasig ang tanan nga gusto mag-negosyo sa tricycle nga dili na maghulat sa ulahi aron malikayan ang problema ug diskwalipikasyon.
