Gibutyag ni Philippine National Police (PNP) chief Rommel Marbil nga 903 ka pulis ang natanggal sa serbisyo kaniadtong 2024 tungod sa lain-laing mga paglapas.
Lakip sa gitaktak nga mga pulis sa nagpadayong internal cleansing sa PNP mao ang lima ka mga opisyal nga adunay ranggo nga lieutenant colonels, unom ka majors 12 captains, ug lima ka lieutenant.
Ang mga natangtang sa serbisyo giingong nalakip sa kinatibuk-ang 2,765 ka mga pulis nga gisilotan tungod sa mga kasong administratiba gikan sa simple hangtod sa grave misconduct.
Gihisgutan usab sa PNP chief nga ang mga silot naglakip sa demotion sa 108 ka pulis, forfeiture sa sweldo sa 103 ka pulis, reprimand sa 423 ka pulis, ug restriction ug withholding of privileges sa 108 ka pulis.
Kahinumduman nga bag-o lang gipamulong ni Presidente Ferdinand “Bongbong” Marcos Jr. nga iyang gikonsiderar nga lugwayan ang termino ni Marbil.
