Gipahibalo sa Public Safety Office (PSO) sa dakbayan sa Heneral Santos nga sugod karong adlawa, Marso 17, 2026, sarado na ang pagdawat sa mga bag-ong aplikante alang sa Motorized Tricycle Operator’s Permit (MTOP) o franchise sa siyudad.
Sumala sa PSO, nakab-ot na ang gitakdang target nga 9,000 ka bag-ong aplikante, hinungdan nga gipahunong na sa lokal nga panggamhanan ang pagdawat sa dugang pang aplikasyon.
Gipasabot sa opisina nga renewal na lamang ang ilang pagadawaton sa karon alang sa mga nag-expire nga franchise aron masiguro nga ang mga existing operators makapadayon sa ilang legal nga operasyon sa pampasaherong traysikol sa siyudad.
Dugang pa sa PSO nga padayon gihapon ang pagproseso ug pagreview sa mga nadawat nga aplikasyon, lakip na ang pag-verify sa mga dokumento ug pagsiguro nga ang mga aplikante mosunod sa mga regulasyon sa transportasyon nga gipatuman sa lokal nga panggamhanan.
Gidasig usab sa PSO ang tanan nga drayber ug operators nga mag-monitor sa opisyal nga pahibalo sa lungsod alang sa posibleng mga sunod nga programa o lakang nga may kalabutan sa franchise sa traysikol sa umaabot.
