Patay ang 90 ka tawo sa pagbuto sa usa ka minahan sa karbon sa amihanang China.
Nahitabo ang gas explosion sa Liushenyu Coal Mine nga gipanag-iya ug gipadagan sa Tongzhou Group sa Shanxi Province.
Liboan ka rescuer ang gipadala sa lugar aron pangitaon ang mga biktima sa insidente.
Anaa usab sa lugar ang mga paramedic ug ambulansiya, ug kapin sa 100 ka tawo ang gidala na sa mga ospital. Base sa gikataho, 247 ka minero ang naa sa site sa dihang nahitabo ang pagbuto.
Human sa insidente, nanawagan si Chinese President Xi Jinping nga dili usikan ang oras sa pagtambal sa mga samaran ug sa pagpangita sa mga survivor.
Gimando usab niya ang hugot nga imbestigasyon sa hinungdan sa aksidente ug ang pagpanubag sa mga responsable.
Sumala sa state media, nadakpan na ang pipila ka opisyal nga nagdumala sa maong minahan.
Sa karon, wala pa gipagawas ang eksaktong hinungdan sa pagbuto, apan base sa mga taho, niabot na sa delikadong lebel ang carbon monoxide, usa ka makahilo ug walay baho nga gas, sulod sa minahan.
Ang Shanxi usa sa labing kabos nga probinsya sa China ug nailhan isip coal mining capital sa nasod.
Ang pinakaulahing susamang trahedya sa wala pa kini nga insidente mao ang pagkalumpag sa usa ka open pit coal mine sa amihanang Inner Mongolia niadtong 2023 nga nakapatay sa 53 ka tawo.
